ab to lab se na jaega aage

ab to lab se na jā.egā aage

naale kā zor shor thā aage

dasht-e-ulfat meñ rahnumā kaisā

maiñ ne rahbar ko dhar liyā aage

dasht-e-ulfat hai garche duur vale

dil se kahtā huuñ ye rahā aage

bevafā.ī agar na kartī umr

ham dikhāte tumheñ vafā aage

vo ḳhushāmad hī meñ ga.e ghabrā

mujh ko kahnā thā mudda.ā aage

dekhnā jo na thā so dekh liyā

dekhiye dekhte haiñ kyā aage

ishq meñ de ke jaañ huī ye ḳhabar

aa gayā kuchh diyā liyā aage

sabr-o-hosh-o-ḳhirad ga.e dil se

merī āñkhoñ ke ghar luTā aage

marg-e-āshiq kī sun ke sab rūdād

pūchhte haiñ ki kyā huā aage

'sālik' aur mai-kashī ḳhudā kī panāh

kis qadar thā ye pārsā aage

ab to lab se na jaega aage

nale ka zor shor tha aage

dasht-e-ulfat mein rahnuma kaisa

main ne rahbar ko dhar liya aage

dasht-e-ulfat hai garche dur wale

dil se kahta hun ye raha aage

bewafai agar na karti umr

hum dikhate tumhein wafa aage

wo KHushamad hi mein gae ghabra

mujh ko kahna tha muddaa aage

dekhna jo na tha so dekh liya

dekhiye dekhte hain kya aage

ishq mein de ke jaan hui ye KHabar

aa gaya kuchh diya liya aage

sabr-o-hosh-o-KHirad gae dil se

meri aankhon ke ghar luTa aage

marg-e-ashiq ki sun ke sab rudad

puchhte hain ki kya hua aage

'salik' aur mai-kashi KHuda ki panah

kis qadar tha ye parsa aage