ab tujhse phira ye dil-e-nakaam hamara

ab tujh se phirā ye dil-e-nākām hamārā

us kūche meñ kam hī rahegā kaam hamārā

hai saḳht mire darpa-e-jāñ terā ġham-e-hijr

jānāñ se kahe jā koī paiġhām hamārā

jāgīr meñ hai ġhair kī vo bosa-e-lab go

qaa.em rahe ye mansab-e-dushnām hamārā

hone nahīñ paate ye mire dīda-e-tar ḳhushk

daulat se tirī tar hai sadā jaam hamārā

do din meñ kisī kaam kā rahne kā nahīñ tū

kuchh tujh se nikal le kabhī to kaam hamārā

ik roz milā ālam-e-mastī meñ jo ham se

tanhā but-e-badmast mai-āshām hamārā

shamshīr alam kar ke lagā kahne rakhūñ Thor

badnām tū kartā phire hai naam hamārā

ayyām ke har zikr se aur fikr se fāriġh

yā ishq hai vird-e-sahar-o-shām hamārā

hotā na farebanda-e-dil kaash ke 'hasrat'

āġhāz meñ ye ishq-e-bad-anjām hamārā

ab tujh se phira ye dil-e-nakaam hamara

us kuche mein kam hi rahega kaam hamara

hai saKHt mere darpa-e-jaan tera gham-e-hijr

jaanan se kahe ja koi paigham hamara

jagir mein hai ghair ki wo bosa-e-lab go

qaem rahe ye mansab-e-dushnam hamara

hone nahin pate ye mere dida-e-tar KHushk

daulat se teri tar hai sada jam hamara

do din mein kisi kaam ka rahne ka nahin tu

kuchh tujh se nikal le kabhi to kaam hamara

ek roz mila aalam-e-masti mein jo hum se

tanha but-e-badmast mai-asham hamara

shamshir alam kar ke laga kahne rakhun Thor

badnam tu karta phire hai nam hamara

ayyam ke har zikr se aur fikr se farigh

ya ishq hai wird-e-sahar-o-sham hamara

hota na farebanda-e-dil kash ke 'hasrat'

aaghaz mein ye ishq-e-bad-anjam hamara