ab tumhaara gham mere dil se bhula sakta hai kaun

ab tumhārā ġham mire dil se bhulā saktā hai kaun

jo tumhārā hai use apnā banā saktā hai kaun

yā to dīvāna hañse yā tum jise taufīq do

varna is duniyā meñ rah kar muskurā saktā hai kaun

ab to dil ghabrā gayā hai shiddat-e-ālām se

tum batāo abr-e-rahmat ban ke chhā saktā hai kaun

ziist se ummīd vābasta hai un ke qurb kī

varna is bār-e-amānat ko uThā saktā hai kaun

vāqif-e-anjām-e-ulfat the ham is ke bāvajūd

vo fareb-e-dostī khāyā hai khā saktā hai kaun

jab karam hotā hai mil jaate haiñ koh-o-dasht meñ

dair-o-ka.aba meñ bhī varna un ko pā saktā hai kaun

ishtiyāq-e-dīd shāyad kar rahā thā rahbarī

kis tarah ham aa.e manzil tak batā saktā hai kaun

ham ne āñkheñ band karke dil meñ dekhā hai tumheñ

sāmne aao to tāb-e-dīd lā saktā hai kaun

mai ho yā mastī ba-qadr-e-zarf miltī hai 'shifā'

aur apne zarf ko un se chhupā saktā hai kaun

ab tumhaara gham mere dil se bhula sakta hai kaun

jo tumhaara hai use apna bana sakta hai kaun

ya to diwana hanse ya tum jise taufiq do

warna is duniya mein rah kar muskura sakta hai kaun

ab to dil ghabra gaya hai shiddat-e-alam se

tum batao abr-e-rahmat ban ke chha sakta hai kaun

zist se ummid wabasta hai un ke qurb ki

warna is bar-e-amanat ko uTha sakta hai kaun

waqif-e-anjam-e-ulfat the hum is ke bawajud

wo fareb-e-dosti khaya hai kha sakta hai kaun

jab karam hota hai mil jate hain koh-o-dasht mein

dair-o-kaba mein bhi warna un ko pa sakta hai kaun

ishtiyaq-e-did shayad kar raha tha rahbari

kis tarah hum aae manzil tak bata sakta hai kaun

hum ne aankhen band karke dil mein dekha hai tumhein

samne aao to tab-e-did la sakta hai kaun

mai ho ya masti ba-qadr-e-zarf milti hai 'shifa'

aur apne zarf ko un se chhupa sakta hai kaun