ab un ka gham bhi hamein dil-kusha sa lagta hai

ab un kā ġham bhī hameñ dil-kushā sā lagtā hai

ye ajnabī to hameñ āshnā sā lagtā hai

fareb-ḳhurda-e-rasm-e-vafā sā lagtā hai

ye zaḳhm-e-dil ki jo hañstā huā sā lagtā hai

ḳhud apne dil se tarāshā hai jo sanam maiñ ne

ḳhudā nahīñ hai vo lekin ḳhudā sā lagtā hai

milā hai jis ko mirī bandagī kā husn-e-ḳhulūs

vo naqsh-e-sajda tire naqsh-e-pā sā lagtā hai

kabhī kabhī tirī yādoñ kī anjuman meñ ye dil

ḳhud apne aap se rūThā huā sā lagtā hai

ruḳh-e-hayāt ye halkā sā ik tabassum bhī

ġham-e-hayāt kā maarā huā sā lagtā hai

badal ga.ī hai ye kis kī nazar ḳhudā jaane

ruḳh-e-hayāt badaltā huā sā lagtā hai

ye dāġh-e-dil haiñ ki ai 'badr' hasratoñ ke sanam

ḳhudā kā ghar hai magar but-kada sā lagtā hai

ab un ka gham bhi hamein dil-kusha sa lagta hai

ye ajnabi to hamein aashna sa lagta hai

fareb-KHurda-e-rasm-e-wafa sa lagta hai

ye zaKHm-e-dil ki jo hansta hua sa lagta hai

KHud apne dil se tarasha hai jo sanam main ne

KHuda nahin hai wo lekin KHuda sa lagta hai

mila hai jis ko meri bandagi ka husn-e-KHulus

wo naqsh-e-sajda tere naqsh-e-pa sa lagta hai

kabhi kabhi teri yaadon ki anjuman mein ye dil

KHud apne aap se ruTha hua sa lagta hai

ruKH-e-hayat ye halka sa ek tabassum bhi

gham-e-hayat ka mara hua sa lagta hai

badal gai hai ye kis ki nazar KHuda jaane

ruKH-e-hayat badalta hua sa lagta hai

ye dagh-e-dil hain ki ai 'badr' hasraton ke sanam

KHuda ka ghar hai magar but-kada sa lagta hai