ab un pe meri aah ka hoga asar kahan

ab un pe merī aah kā hogā asar kahāñ

kyā haal hai mirā unheñ is kī ḳhabar kahāñ

ab un ke dil meñ ham se faqīroñ kā ghar kahāñ

bas dekhiye ke phirte haiñ ham dar-ba-dar kahāñ

ik mushkiloñ kī dhuup se merā hai sāmnā

āsāniyoñ kā raah meñ koī shajar kahāñ

muddat huī ke iid mayassar nahīñ hameñ

aayā hai chāñd ham ko hamārā nazar kahāñ

bas ai tabīb nusḳha-e-dīdār likh mujhe

in marhamoñ se bhartā hai zaḳhm-e-jigar kahāñ

har aan nafratoñ kā hai pahrā galī galī

ab ham kareñ talāsh mohabbat-nagar kahāñ

har moḌ par hai ek musībat se sāmnā

ab jaane ḳhatm hogā mirā ye safar kahāñ

tārīk ho chukī yahāñ 'haidar' kī zindagī

us ko nasīb ishq ke shams-o-qamar kahāñ

ab un pe meri aah ka hoga asar kahan

kya haal hai mera unhen is ki KHabar kahan

ab un ke dil mein hum se faqiron ka ghar kahan

bas dekhiye ke phirte hain hum dar-ba-dar kahan

ek mushkilon ki dhup se mera hai samna

aasaniyon ka rah mein koi shajar kahan

muddat hui ke id mayassar nahin hamein

aaya hai chand hum ko hamara nazar kahan

bas ai tabib nusKHa-e-didar likh mujhe

in marhamon se bharta hai zaKHm-e-jigar kahan

har aan nafraton ka hai pahra gali gali

ab hum karen talash mohabbat-nagar kahan

har moD par hai ek musibat se samna

ab jaane KHatm hoga mera ye safar kahan

tarik ho chuki yahan 'haidar' ki zindagi

us ko nasib ishq ke shams-o-qamar kahan