ab unhen apni adaon se hijab aata hai

ab unheñ apnī adāoñ se hijāb aatā hai

chashm-e-bad-dūr dulhan ban ke shabāb aatā hai

hijr meñ bhī mujhe imdād-e-ajal hai darkār

merī turbat pe na aa tujh se hijāb aatā hai

diid āḳhir hai ulaT dījiye chehre se naqāb

aaj mushtāq ke chehre pe naqāb aatā hai

kis taraf josh-e-karam terī nigāheñ uTThīñ

kaun mahshar meñ sazā-vār-e-itāb aatā hai

maut kī niind bhī ab chain se sonā mālūm

ki janāze pe vo ġhārat-gar-e-ḳhvāb aatā hai

dil ko is tarah Thahar jaane kī aadat to na thī

kyuuñ ajal kyā mire naame kā javāb aatā hai

jalva-e-rañg hai nairañg-e-taqāzā-e-nigāh

koī majbūr tamāsha-e-sarāb aatā hai

ho gayā ḳhuun tire hijr meñ dil kā shāyad

ab tasavvur bhī tirā naqsh-bar-āb aatā hai

miltī jultī hai mirī umr-e-do-roza 'fānī'

jī bhar aatā hai agar zikr-e-habāb aatā hai

ab unhen apni adaon se hijab aata hai

chashm-e-bad-dur dulhan ban ke shabab aata hai

hijr mein bhi mujhe imdad-e-ajal hai darkar

meri turbat pe na aa tujh se hijab aata hai

did aaKHir hai ulaT dijiye chehre se naqab

aaj mushtaq ke chehre pe naqab aata hai

kis taraf josh-e-karam teri nigahen uTThin

kaun mahshar mein saza-war-e-itab aata hai

maut ki nind bhi ab chain se sona malum

ki janaze pe wo ghaarat-gar-e-KHwab aata hai

dil ko is tarah Thahar jaane ki aadat to na thi

kyun ajal kya mere name ka jawab aata hai

jalwa-e-rang hai nairang-e-taqaza-e-nigah

koi majbur tamasha-e-sarab aata hai

ho gaya KHun tere hijr mein dil ka shayad

ab tasawwur bhi tera naqsh-bar-ab aata hai

milti julti hai meri umr-e-do-roza 'fani'

ji bhar aata hai agar zikr-e-habab aata hai