ab uske dil mein kya jaane aaya kya

ab us ke dil meñ kyā jaane aayā kyā

matlab kyā thā aur mujhe samjhāyā kyā

ūñchī-nīchī dīvāreñ haiñ chaar taraf

koī paḌosī kaisā aur ham-sāya kyā

jānī-pahchānī sī aahaT lagtī hai

dil ke vīrāne meñ koī aayā kyā

ek ghanī nīchī chhat aam ke bāġhoñ kī

mast mahaktī baur meñ dhuup aur saaya kyā

kahāñ ab is sahrā meñ huuñ mā'lūm nahīñ

maiñ ne sang-e-rāh samajh ke haTāyā kyā

itne gahre jaanā tere bas meñ nahīñ

mujh ko pata hai dariyā se tū laayā kyā

dil ā.īna ban jaa.e to bahut jaano

varna miTTī kyā miTTī kī maaya kyā

apne ghar kī dīvāreñ hī girā deñ 'zeb'

baiThe baiThe merā dil ghabrāyā kyā

ab us ke dil mein kya jaane aaya kya

matlab kya tha aur mujhe samjhaya kya

unchi-nichi diwaren hain chaar taraf

koi paDosi kaisa aur ham-saya kya

jaani-pahchani si aahaT lagti hai

dil ke virane mein koi aaya kya

ek ghani nichi chhat aam ke baghon ki

mast mahakti baur mein dhup aur saya kya

kahan ab is sahra mein hun ma'lum nahin

main ne sang-e-rah samajh ke haTaya kya

itne gahre jaana tere bas mein nahin

mujh ko pata hai dariya se tu laya kya

dil aaina ban jae to bahut jaano

warna miTTi kya miTTi ki maya kya

apne ghar ki diwaren hi gira den 'zeb'

baiThe baiThe mera dil ghabraya kya