ab wahi harf-e-junun sab ki zaban Thahri hai

ab vahī harf-e-junūñ sab kī zabāñ Thahrī hai

jo bhī chal niklī hai vo baat kahāñ Thahrī hai

aaj tak shaiḳh ke ikrām meñ jo shai thī harām

ab vahī dushman-e-dīñ rāhat-e-jāñ Thahrī hai

hai ḳhabar garm ki phirtā hai gurezāñ nāseh

guftugū aaj sar-e-kū-e-butāñ Thahrī hai

hai vahī āriz-e-lailā vahī shīrīñ kā dahan

nigah-e-shauq ghaḌī bhar ko jahāñ Thahrī hai

vasl kī shab thī to kis darja subuk guzrī thī

hijr kī shab hai to kyā saḳht girāñ Thahrī hai

bikhrī ik baar to haath aa.ī hai kab mauj-e-shamīm

dil se niklī hai to kab lab pe fuġhāñ Thahrī hai

dast-e-sayyād bhī aajiz hai kaf-e-gul-chīñ bhī

bū-e-gul Thahrī na bulbul kī zabāñ Thahrī hai

aate aate yūñhī dam bhar ko rukī hogī bahār

jaate jaate yūñhī pal bhar ko ḳhizāñ Thahrī hai

ham ne jo tarz-e-fuġhāñ kī hai qafas meñ ījād

'faiz' gulshan meñ vahī tarz-e-bayāñ Thahrī hai

ab wahi harf-e-junun sab ki zaban Thahri hai

jo bhi chal nikli hai wo baat kahan Thahri hai

aaj tak shaiKH ke ikram mein jo shai thi haram

ab wahi dushman-e-din rahat-e-jaan Thahri hai

hai KHabar garm ki phirta hai gurezan naseh

guftugu aaj sar-e-ku-e-butan Thahri hai

hai wahi aariz-e-laila wahi shirin ka dahan

nigah-e-shauq ghaDi bhar ko jahan Thahri hai

wasl ki shab thi to kis darja subuk guzri thi

hijr ki shab hai to kya saKHt giran Thahri hai

bikhri ek bar to hath aai hai kab mauj-e-shamim

dil se nikli hai to kab lab pe fughan Thahri hai

dast-e-sayyaad bhi aajiz hai kaf-e-gul-chin bhi

bu-e-gul Thahri na bulbul ki zaban Thahri hai

aate aate yunhi dam bhar ko ruki hogi bahaar

jate jate yunhi pal bhar ko KHizan Thahri hai

hum ne jo tarz-e-fughan ki hai qafas mein ijad

'faiz' gulshan mein wahi tarz-e-bayan Thahri hai