ab wo aangan wo ghar na khaprelen

ab vo āñgan vo ghar na khapreleñ

peḌ panchhī na phuul aur beleñ

zindagī ham tire muhāfiz haiñ

kyoñ na phir apnī jaan par kheleñ

āsmāñ se humaktā rahtā hai

chāñd ko laao god meñ le leñ

apne ghar kī ghuTan hī behtar hai

hijratoñ kā azaab kyoñ jheleñ

vazn par hoñ ġhazal ke sab misre

pīḌhiyoñ se na utrīñ ye raileñ

kyā jarā.em kā sadd-e-bāb huā

aur ābād ho ga.iiñ jeleñ

ab to sastī hai shā.irī 'parvīn'

lagtī rahtī haiñ aa.e din seleñ

ab wo aangan wo ghar na khaprelen

peD panchhi na phul aur belen

zindagi hum tere muhafiz hain

kyon na phir apni jaan par khelen

aasman se humakta rahta hai

chand ko lao god mein le len

apne ghar ki ghuTan hi behtar hai

hijraton ka azab kyon jhelen

wazn par hon ghazal ke sab misre

piDhiyon se na utrin ye railen

kya jaraem ka sadd-e-bab hua

aur aabaad ho gain jelen

ab to sasti hai shairi 'parwin'

lagti rahti hain aae din selen