ab wo kahte hain muddaa kahiye

ab vo kahte haiñ mudda.ā kahiye

sochtā huuñ ki 'naqsh' kyā kahiye

zindagī zindagī se ruuTh ga.ī

haa.e ab kis ko āshnā kahiye

hai taġhāful kā kyuuñ gila un se

āh-e-sozāñ ko nā-rasā kahiye

apnī kashtī to Duub hī jaatī

azm-e-mohkam ko nāḳhudā kahiye

thartharāhaT hayā kī us ruḳh par

raqs-e-nairañgī-e-sabā kahiye

khoī khoī haiñ dhaḌkaneñ dil kī

phir mohabbat kī ibtidā kahiye

ittifāqan ye aap kā milnā

ek rañgīn hādsa kahiye

nā-shanās-e-alam ho jo hastī

sach to ye hai ki be-mazā kahiye

dushman-e-jāñ to dushman-e-jāñ hai

ġhamgusāroñ ko 'naqsh' kyā kahiye

ab wo kahte hain muddaa kahiye

sochta hun ki 'naqsh' kya kahiye

zindagi zindagi se ruTh gai

hae ab kis ko aashna kahiye

hai taghaful ka kyun gila un se

aah-e-sozan ko na-rasa kahiye

apni kashti to Dub hi jati

azm-e-mohkam ko naKHuda kahiye

thartharahaT haya ki us ruKH par

raqs-e-nairangi-e-saba kahiye

khoi khoi hain dhaDkanen dil ki

phir mohabbat ki ibtida kahiye

ittifaqan ye aap ka milna

ek rangin hadsa kahiye

na-shanas-e-alam ho jo hasti

sach to ye hai ki be-maza kahiye

dushman-e-jaan to dushman-e-jaan hai

ghamgusaron ko 'naqsh' kya kahiye