اب یہاں صاحب تسلیم و رضا کوئی نہیں

اب یہاں صاحب تسلیم و رضا کوئی نہیں

تجربہ یہ ہوا پابند وفا کوئی نہیں

غم تو یہ ہے کہ جو برہم تھے وہ برہم ہی رہے

اپنے مٹنے کا ہمیں شکوہ گلہ کوئی نہیں

راہرو جادۂ ہستی سے گزرتے ہی رہے

چھوڑ کر نقش قدم اپنے گیا کوئی نہیں

ہم تو چلتے رہے کانٹوں کی گزر گاہوں پر

ہم سفر راہ میں تا دور ملا کوئی نہیں

شہر کا شہر ہوا آتش تخریب کی نذر

لوگ کہتے ہیں کہ شعلوں میں جلا کوئی نہیں

یوں ہی گردش میں شب و روز گزر جاتے ہیں

ایک مرکز پہ زمانے میں رہا کوئی نہیں