ab ye aalam hai ki jis shai pe nazar jati hai

ab ye aalam hai ki jis shai pe nazar jaatī hai

hū-ba-hū aap kī tasvīr nazar aatī hai

ḳhud ko tārīḳh kisī vaqt jo dohrātī hai

mere hālāt pe duniyā ko hañsā jaatī hai

yād-e-ayyām-e-bahārāñ bhī nahīñ vaj.h-e-sukūñ

ab to taz.īn-e-qafas hī mujhe bahlātī hai

barq ban ban ke girī hai mire dil par aksar

vo tajallī jo sar-e-tūr nazar aatī hai

aaj kuchh un kī tavajjoh meñ kamī paatā huuñ

zindagī maut se do-chār huī jaatī hai

dil bhar aatā hai mirā dekh ke nam aañkh koī

apne rone pe to ab mujh ko hañsī aatī hai

maiñ vo ik nañg-e-zamāna huuñ azal hī se 'ra.īs'

zindagī hai ki mire naam se sharmātī hai

ab ye aalam hai ki jis shai pe nazar jati hai

hu-ba-hu aap ki taswir nazar aati hai

KHud ko tariKH kisi waqt jo dohraati hai

mere haalat pe duniya ko hansa jati hai

yaad-e-ayyam-e-bahaaran bhi nahin wajh-e-sukun

ab to tazin-e-qafas hi mujhe bahlati hai

barq ban ban ke giri hai mere dil par aksar

wo tajalli jo sar-e-tur nazar aati hai

aaj kuchh un ki tawajjoh mein kami pata hun

zindagi maut se do-chaar hui jati hai

dil bhar aata hai mera dekh ke nam aankh koi

apne rone pe to ab mujh ko hansi aati hai

main wo ek nang-e-zamana hun azal hi se 'rais'

zindagi hai ki mere nam se sharmati hai