ab ye bachche nahin bahlawe mein aane wale

ab ye bachche nahīñ bahlāve meñ aane vaale

kal bhī aa.e the idhar khel dikhāne vaale

ek muddat se ḳhamoshī kā hai pahra har-sū

jaane kis or ga.e shor machāne vaale

hū kā aalam jo thā pahle vo hai qaa.em ab bhī

ghūmte thak ga.e bastī ko jagāne vaale

ishq kī aag ne jalvaoñ ko javāñ rakkhā hai

log baaqī haiñ abhī naaz uThāne vaale

us kā har tīr-e-nazar dil meñ utar jaatā hai

yuuñ to dekhe haiñ bahut ham ne nishāne vaale

jis ko karnā thā yahāñ kaam vo to kar bhī ga.e

rat-jagā karte rahe Dhol bajāne vaale

ab to sahrā meñ samundar kā sakūñ dar aayā

jab se anqā hue haiñ ḳhaak uḌāne vaale

ab ye bachche nahin bahlawe mein aane wale

kal bhi aae the idhar khel dikhane wale

ek muddat se KHamoshi ka hai pahra har-su

jaane kis or gae shor machane wale

hu ka aalam jo tha pahle wo hai qaem ab bhi

ghumte thak gae basti ko jagane wale

ishq ki aag ne jalwaon ko jawan rakkha hai

log baqi hain abhi naz uThane wale

us ka har tir-e-nazar dil mein utar jata hai

yun to dekhe hain bahut hum ne nishane wale

jis ko karna tha yahan kaam wo to kar bhi gae

rat-jaga karte rahe Dhol bajaane wale

ab to sahra mein samundar ka sakun dar aaya

jab se anqa hue hain KHak uDane wale