ab zaban KHanjar-e-qatil ki sana karti hai

ab zabāñ ḳhanjar-e-qātil kī sanā kartī hai

ham vahī karte haiñ jo ḳhalq-e-ḳhudā kartī hai

phir koī raat bujhā detī hai merī āñkheñ

phir koī sub.h darīche mire vā kartī hai

ek paimān-e-vafā ḳhāk-basar hai sar-e-shām

ḳhema ḳhālī huā tanhā.ī azā kartī hai

hū kā 'ālam hai giraftāroñ kī ābādī meñ

ham to sunte the ki zanjīr sadā kartī hai

kaisī miTTī hai ki dāman se lipaTtī hī nahīñ

kaisī maañ hai ki jo bachchoñ ko judā kartī hai

ab numūdār ho is gard se ai nāqa-savār

kab se bastī tire milne kī du'ā kartī hai

ab zaban KHanjar-e-qatil ki sana karti hai

hum wahi karte hain jo KHalq-e-KHuda karti hai

phir koi raat bujha deti hai meri aankhen

phir koi subh dariche mere wa karti hai

ek paiman-e-wafa KHak-basar hai sar-e-sham

KHema KHali hua tanhai aza karti hai

hu ka 'alam hai giraftaron ki aabaadi mein

hum to sunte the ki zanjir sada karti hai

kaisi miTTi hai ki daman se lipaTti hi nahin

kaisi man hai ki jo bachchon ko juda karti hai

ab numudar ho is gard se ai naqa-sawar

kab se basti tere milne ki du'a karti hai