abas wajud ka dukh tangi-e-hayat ka dukh

abas vajūd kā dukh tañgī-e-hayāt kā dukh

ki dil ne paalā huā hai har ek zaat kā dukh

talāsh-e-jannat-o-dozaḳh meñ rā.egāñ insāñ

zamīñ pe roz manātā hai kā.enāt kā dukh

ka.ī jhameloñ meñ uljhī sī bad-maza chaa.e

udaas mez pe daftar ke kāġhzāt kā dukh

ga.e dinoñ kā koī ḳhvāb dafn hai shāyad

ki ab bhī aañkh se ristā hai bāqiyāt kā dukh

maiñ aal se huuñ shah-e-karbalā kī so mujh ko

chanāb se bhī milā hai vahī furāt kā dukh

na jaane mālik-e-kun kis tarah nibhātā hai

ye dastaras kī suhūlat ye mumkināt kā dukh

abas wajud ka dukh tangi-e-hayat ka dukh

ki dil ne pala hua hai har ek zat ka dukh

talash-e-jannat-o-dozaKH mein raegan insan

zamin pe roz manata hai kaenat ka dukh

kai jhamelon mein uljhi si bad-maza chae

udas mez pe daftar ke kaghzat ka dukh

gae dinon ka koi KHwab dafn hai shayad

ki ab bhi aankh se rista hai baqiyat ka dukh

main aal se hun shah-e-karbala ki so mujh ko

chanab se bhi mila hai wahi furaat ka dukh

na jaane malik-e-kun kis tarah nibhata hai

ye dastaras ki suhulat ye mumkinat ka dukh