abhi aae the abhi chal base marne wale

abhī aa.e the abhī chal base marne vaale

yuuñ safar karte haiñ duniyā se guzarne vaale

āfateñ Dhāte haiñ duniyā meñ sañvarne vaale

luuT lete haiñ zamāne ko nikharne vaale

sifat-e-bū-e-gul is bāġh-e-jahāñ se guzre

kyā subuk-dosh ga.e aap pe marne vaale

aap miT jaa.eñ magar rad na ho saa.il kā savāl

ham to haiñ qabr kā muñh ḳhaak se bharne vaale

naam se rāh-e-adam ke mujhe kyoñ vahshat hai

muñh dikhāte nahīñ dil le ke mukarne vaale

duur hī ghar haiñ ghar āñgan haiñ parī-zādoñ ke

āñkhoñ meñ phirte haiñ ye dil meñ utarne vaale

kashtī-e-umr kināre ke qarīb aa pahuñchī

bahr-e-hastī se haiñ ham paar utarne vaale

ḳhuub dekhī hai añdherī shab-e-ġham kī 'akbar'

ham nahīñ tīrgī-e-qabr se Darne vaale

abhi aae the abhi chal base marne wale

yun safar karte hain duniya se guzarne wale

aafaten Dhate hain duniya mein sanwarne wale

luT lete hain zamane ko nikharne wale

sifat-e-bu-e-gul is bagh-e-jahan se guzre

kya subuk-dosh gae aap pe marne wale

aap miT jaen magar rad na ho sail ka sawal

hum to hain qabr ka munh KHak se bharne wale

nam se rah-e-adam ke mujhe kyon wahshat hai

munh dikhate nahin dil le ke mukarne wale

dur hi ghar hain ghar aangan hain pari-zadon ke

aankhon mein phirte hain ye dil mein utarne wale

kashti-e-umr kinare ke qarib aa pahunchi

bahr-e-hasti se hain hum par utarne wale

KHub dekhi hai andheri shab-e-gham ki 'akbar'

hum nahin tirgi-e-qabr se Darne wale