abhi chaman hai qafas to abhi qafas hai chaman

abhī chaman hai qafas to abhī qafas hai chaman

nazāra-e-chaman-e-rozgār kartā jā

chalā hai bādiya-e-justujū ko tai karne

shugūn-e-girya-e-be-iḳhtiyār kartā jā

naqāb-e-āriz-e-rangīñ haTā ke ai dilbar

jahāñ ke ban ko hamesha bahār kartā jā

ġhash aa gayā hai tamāshā.iyoñ ko jalve se

sadā sunā ke unheñ hoshiyār kartā jā

tajalliyoñ ke liye koī vaqt ḳhaas nahīñ

kiyā hai aur yūhīñ intizār kartā jā

shikanja naza.a kā jis dam haTā sadā aa.ī

ki jism-e-zār ko nazr-e-fishār kartā jā

yūhīñ balā se qayāmat kā din guzar jaa.e

gunāh apne batā.ūñ shumār kartā jā

samajhne paa.e kabhī āsmāñ na ai 'beḳhud'

ye jitnā jabr kare inkisār kartā jā

abhi chaman hai qafas to abhi qafas hai chaman

nazara-e-chaman-e-rozgar karta ja

chala hai baadiya-e-justuju ko tai karne

shugun-e-girya-e-be-iKHtiyar karta ja

naqab-e-ariz-e-rangin haTa ke ai dilbar

jahan ke ban ko hamesha bahaar karta ja

ghash aa gaya hai tamashaiyon ko jalwe se

sada suna ke unhen hoshiyar karta ja

tajalliyon ke liye koi waqt KHas nahin

kiya hai aur yuhin intizar karta ja

shikanja naza ka jis dam haTa sada aai

ki jism-e-zar ko nazr-e-fishaar karta ja

yuhin bala se qayamat ka din guzar jae

gunah apne bataun shumar karta ja

samajhne pae kabhi aasman na ai 'beKHud'

ye jitna jabr kare inkisar karta ja