abhi dard-e-dil mein kami kahan abhi chaaragar ki talash hai

abhī dard-e-dil meñ kamī kahāñ abhī chārāgar kī talāsh hai

mirī zindagī hai vo shām-e-ġham ki jise sahar kī talāsh hai

yahī shauq hai yahī mudda.ā yahī iltijā yahī aarzū

mirī zindagī jo sañvār de mujhe us nazar kī talāsh hai

mujhe rah-guzār-e-hayāt meñ pa.e-rahbarī pa.e-bandagī

tire naqsh-e-pā kī talāsh hai tire sang-e-dar kī talāsh hai

jo bhaTak rahā hai dil-e-hazīñ rah-e-āshiqī meñ idhar-udhar

kisī rāhbar kī talāsh hai kisī ham-safar kī talāsh hai

vo ġhazal ko sun ke 'riyāz' kī yahī aah kah ke guzar ga.e

kisī dil-jale kī hai dāstāñ kisī nauhagar kī talāsh hai

abhi dard-e-dil mein kami kahan abhi chaaragar ki talash hai

meri zindagi hai wo sham-e-gham ki jise sahar ki talash hai

yahi shauq hai yahi muddaa yahi iltija yahi aarzu

meri zindagi jo sanwar de mujhe us nazar ki talash hai

mujhe rah-guzar-e-hayat mein pae-rahbari pae-bandagi

tere naqsh-e-pa ki talash hai tere sang-e-dar ki talash hai

jo bhaTak raha hai dil-e-hazin rah-e-ashiqi mein idhar-udhar

kisi rahbar ki talash hai kisi ham-safar ki talash hai

wo ghazal ko sun ke 'riyaz' ki yahi aah kah ke guzar gae

kisi dil-jale ki hai dastan kisi nauhagar ki talash hai