abhi dil ko kahan rahat mili hai

abhī dil ko kahāñ rāhat milī hai

vahī ehsās-e-ġham hai ġham vahī hai

liye jaa.eñ kahāñ tak ġham ke tohfe

kahāñ tak āzmā.ish kī ghaḌī hai

ghuTā jaatā hai dam ab bastiyoñ meñ

dhueñ kī mauj har ghar se uThī hai

bhaTaktā hai vahī dasht-e-talab meñ

jo dil dīvāna-e-āsūdgī hai

nazar aatā hai zarra zarra sho.ala

ye kaisī rut havā kaisī chalī hai

kisī din be-ḳhabar ho jā.ūñ ḳhud se

musalsal fikr-e-shorīda-sarī hai

jo yuuñ dekho to ik aalam hai raushan

magar socho to har-sū tīrgī hai

har ik patthar ko hiirā kyoñ samajh leñ

har ik patthar agarche dīdanī hai

kabhī ārām-e-jāñ thī ḳhud-kalāmī

'shamīm' ab ye azāb-e-zindagī hai

abhi dil ko kahan rahat mili hai

wahi ehsas-e-gham hai gham wahi hai

liye jaen kahan tak gham ke tohfe

kahan tak aazmaish ki ghaDi hai

ghuTa jata hai dam ab bastiyon mein

dhuen ki mauj har ghar se uThi hai

bhaTakta hai wahi dasht-e-talab mein

jo dil diwana-e-asudgi hai

nazar aata hai zarra zarra shoala

ye kaisi rut hawa kaisi chali hai

kisi din be-KHabar ho jaun KHud se

musalsal fikr-e-shorida-sari hai

jo yun dekho to ek aalam hai raushan

magar socho to har-su tirgi hai

har ek patthar ko hira kyon samajh len

har ek patthar agarche didani hai

kabhi aaram-e-jaan thi KHud-kalami

'shamim' ab ye azab-e-zindagi hai