ابھی دل کو کہاں راحت ملی ہے

ابھی دل کو کہاں راحت ملی ہے

وہی احساس غم ہے غم وہی ہے

لئے جائیں کہاں تک غم کے تحفے

کہاں تک آزمائش کی گھڑی ہے

گھٹا جاتا ہے دم اب بستیوں میں

دھوئیں کی موج ہر گھر سے اٹھی ہے

بھٹکتا ہے وہی دشت طلب میں

جو دل دیوانۂ آسودگی ہے

نظر آتا ہے ذرہ ذرہ شعلہ

یہ کیسی رت ہوا کیسی چلی ہے

کسی دن بے خبر ہو جاؤں خود سے

مسلسل فکر شوریدہ سری ہے

جو یوں دیکھو تو اک عالم ہے روشن

مگر سوچو تو ہر سو تیرگی ہے

ہر اک پتھر کو ہیرا کیوں سمجھ لیں

ہر اک پتھر اگرچہ دیدنی ہے

کبھی آرام جاں تھی خود کلامی

شمیمؔ اب یہ عذاب زندگی ہے