abhi gulon mein koi joshish-e-numu to nahin

abhī guloñ meñ koī joshish-e-numū to nahīñ

abhī bahār pe duniyā-e-rang-o-bū to nahīñ

ba-rang-e-ġhuncha huā chaak chaak dāman-e-dil

kisī bhī chaak ko ab hājat-e-rafū to nahīñ

dhuāñ dhuāñ hai har ik saañs sozish-e-ġham se

ki dil meñ ātish-e-sayyāl hai lahū to nahīñ

ye aur baat hai ham-dam se hāl-e-zār kahūñ

majāl-e-arz magar tere rū-ba-rū to nahīñ

na jaane ālam-e-hastī hai kyoñ hasīn itnā

ye sochtā huuñ ki parde meñ is ke tū to nahīñ

kahīñ ḳhulūs kī mahfil na zindagī kā maqām

nahīñ nahīñ ye mirā shahr-e-ārzū to nahīñ

ḳhizāñ-parast rahe jo bahār ke dushman

dayār-e-gul meñ koī un kī aabrū to nahīñ

añdherī raat kaThin rāsta kaḌī manzil

koī ġharīb kahīñ garm-e-justujū to nahīñ

zabān-e-hāl se rūdād-e-ġham sunātā huuñ

karishma hai ye ḳhamoshī kā guftugū to nahīñ

kahīñ ye bāda-e-gulgūñ se mahkā mahkā jahāñ

'nazīr' kārgah-e-sāġhar-o-subū to nahīñ

abhi gulon mein koi joshish-e-numu to nahin

abhi bahaar pe duniya-e-rang-o-bu to nahin

ba-rang-e-ghuncha hua chaak chaak daman-e-dil

kisi bhi chaak ko ab hajat-e-rafu to nahin

dhuan dhuan hai har ek sans sozish-e-gham se

ki dil mein aatish-e-sayyal hai lahu to nahin

ye aur baat hai ham-dam se haal-e-zar kahun

majal-e-arz magar tere ru-ba-ru to nahin

na jaane aalam-e-hasti hai kyon hasin itna

ye sochta hun ki parde mein is ke tu to nahin

kahin KHulus ki mahfil na zindagi ka maqam

nahin nahin ye mera shahr-e-arzu to nahin

KHizan-parast rahe jo bahaar ke dushman

dayar-e-gul mein koi un ki aabru to nahin

andheri raat kaThin rasta kaDi manzil

koi gharib kahin garm-e-justuju to nahin

zaban-e-haal se rudad-e-gham sunata hun

karishma hai ye KHamoshi ka guftugu to nahin

kahin ye baada-e-gulgun se mahka mahka jahan

'nazir' kargah-e-saghar-o-subu to nahin