abhi hai unki jafaon ki ek chubhan baqi

abhī hai un kī jafāoñ kī ik chubhan baaqī

fuġhāñ-o-nauhagarī kī hai kuchh agan baaqī

'ibādatoñ meñ taqaddus kā ab chalan hai kahāñ

jabīn-e-zuhd meñ sajdoñ kī hai chubhan baaqī

hai pās-e-hukm-e-ḳhudā na ḳhayāl mahshar kā

faqat hai andhe 'aqā.ed kā ab chalan baaqī

har ek gaam bichhī hai bisāt-e-rusvā.ī

na sabza-zār haiñ ab aur na vo chaman baaqī

fasurdagī ke añdheroñ meñ kho.e rahte haiñ

na vo ḳhushī hai mayassar na vo lagan baaqī

laboñ pe raqs-e-tabassum thā aaj tak mere

hai paas kuchh to mahaz ranj aur mehan baaqī

payambarī kā nahīñ shauq mujh ko ai 'mohsin'

hai dil meñ mere faqat aaj fikr-e-fan baaqī

abhi hai un ki jafaon ki ek chubhan baqi

fughan-o-nauhagari ki hai kuchh agan baqi

'ibaadaton mein taqaddus ka ab chalan hai kahan

jabin-e-zuhd mein sajdon ki hai chubhan baqi

hai pas-e-hukm-e-KHuda na KHayal mahshar ka

faqat hai andhe 'aqaed ka ab chalan baqi

har ek gam bichhi hai bisat-e-ruswai

na sabza-zar hain ab aur na wo chaman baqi

fasurdagi ke andheron mein khoe rahte hain

na wo KHushi hai mayassar na wo lagan baqi

labon pe raqs-e-tabassum tha aaj tak mere

hai pas kuchh to mahaz ranj aur mehan baqi

payambari ka nahin shauq mujh ko ai 'mohsin'

hai dil mein mere faqat aaj fikr-e-fan baqi