abhi ek aas hai saqi ki daur-e-jam aata hai

abhī ik aas hai saaqī ki daur-e-jām aatā hai

ulaT deñ mai-kada rindoñ ko ye bhī kaam aatā hai

kuchh is tarkīb se ab āshiyāñ ābād hote haiñ

ki barbādī kā ḳhud apne hī sar ilzām aatā hai

ye kyā bad-nazmiyāñ haiñ tere maiḳhāne meñ ai saaqī

kisī ke naam kā sāġhar kisī ke naam aatā hai

mire ashkoñ se nisbat kyā tabassum ko tire lekin

shaguft-e-gul kā kuchh shabnam pe bhī ilzām aatā hai

kahāñ kī yaad kis kā zikr un kī bazm-e-rangīñ meñ

hamārā naam bhī ab to barā.e-nām aatā hai

ḳhudā shāhid ki dil se to ḳhudā kā naam letā huuñ

magar lab par jab aatā hai tumhārā naam aatā hai

adab se arsh-e-a.azam bhī jhukā detā hai sar apnā

harīm-e-quds meñ insān kā jab naam aatā hai

'shifā' ye inqalāb ik imtihāñ hai ahl-e-ulfat kā

hameñ ye dekhnā hai kaun kis ke kaam aatā hai

abhi ek aas hai saqi ki daur-e-jam aata hai

ulaT den mai-kada rindon ko ye bhi kaam aata hai

kuchh is tarkib se ab aashiyan aabaad hote hain

ki barbaadi ka KHud apne hi sar ilzam aata hai

ye kya bad-nazmiyan hain tere maiKHane mein ai saqi

kisi ke nam ka saghar kisi ke nam aata hai

mere ashkon se nisbat kya tabassum ko tere lekin

shaguft-e-gul ka kuchh shabnam pe bhi ilzam aata hai

kahan ki yaad kis ka zikr un ki bazm-e-rangin mein

hamara nam bhi ab to barae-nam aata hai

KHuda shahid ki dil se to KHuda ka nam leta hun

magar lab par jab aata hai tumhaara nam aata hai

adab se arsh-e-azam bhi jhuka deta hai sar apna

harim-e-quds mein insan ka jab nam aata hai

'shifa' ye inqalab ek imtihan hai ahl-e-ulfat ka

hamein ye dekhna hai kaun kis ke kaam aata hai