abhi kahani mein bach nikalne ke raste hain

abhī kahānī meñ bach nikalne ke rāste haiñ

abhī to gintī kī dastaras meñ ye hādse haiñ

hamāre hāthoñ meñ nā-murādī kī chābiyāñ haiñ

ham apne kamre ko ik aziyyat se kholte haiñ

ye shab ko galiyoñ meñ kaun phirtā hai sar jhukā.e

charāġh tāqoñ meñ kis ke hisse kā ūñghte haiñ

kisī tarah se unheñ haqīqat meñ khīñch laa.eñ

ham apnī āñkhoñ ke sabz ḳhvāboñ ko aiñThte haiñ

vajūd-e-ḳhākī kā rañg-o-roġhan utar chukā hai

so apne hisse kā jitnā jiinā thā jī chuke haiñ

ka.ī zabānoñ ne chakh liyā hai nayā zamāna

ka.ī zabānoñ pe ab bhī maazī ke zā.iqe haiñ

malāl hotā hai jin kā Tahnī ko aaj 'qāsim'

vo ḳhushk patte havā ne kab ke uḌā diye haiñ

abhi kahani mein bach nikalne ke raste hain

abhi to ginti ki dastaras mein ye hadse hain

hamare hathon mein na-muradi ki chabiyan hain

hum apne kamre ko ek aziyyat se kholte hain

ye shab ko galiyon mein kaun phirta hai sar jhukae

charagh taqon mein kis ke hisse ka unghte hain

kisi tarah se unhen haqiqat mein khinch laen

hum apni aankhon ke sabz KHwabon ko ainThte hain

wajud-e-KHaki ka rang-o-roghan utar chuka hai

so apne hisse ka jitna jina tha ji chuke hain

kai zabanon ne chakh liya hai naya zamana

kai zabanon pe ab bhi mazi ke zaiqe hain

malal hota hai jin ka Tahni ko aaj 'qasim'

wo KHushk patte hawa ne kab ke uDa diye hain