abhi KHamosh hain sholon ka andaza nahin hota

abhī ḳhāmosh haiñ sho'loñ kā andāza nahīñ hotā

mirī bastī meñ hañgāmoñ kā andāza nahīñ hotā

jidhar mahsūs ho ḳhushbū usī jānib baḌhe jaao

añdherī raat meñ rastoñ kā andāza nahīñ hotā

jo sadiyoñ kī kasak le kar guzar jaate haiñ duniyā se

muarriḳh ko bhī un lamhoñ kā andāza nahīñ hotā

ye rahbar haiñ ki rahzan haiñ masīhā haiñ ki qātil haiñ

hameñ apne numā.indoñ kā andāza nahīñ hotā

nazar ho laakh gahrī aur basīrat-āshnā phir bhī

naqāboñ meñ kabhī chehroñ kā andāza nahīñ hotā

zamīñ par aao phir dekho hamārī ahmiyat kyā hai

bulandī se kabhī zarroñ kā andāza nahīñ hotā

vafāoñ ke tasalsul se bhī aksar TuuT jaate haiñ

mohabbat ke hasīñ rishtoñ kā andāza nahīñ hotā

utar jaate haiñ ruuh o dil meñ kitnī vus.ateñ le kar

ġhazal ke dilrubā lahjoñ kā andāza nahīñ hotā

salīqe se sajānā ā.inoñ ko varna ai 'razmī'

ġhalat ruḳh ho to phir chehroñ kā andāza nahīñ hotā

abhi KHamosh hain sho'lon ka andaza nahin hota

meri basti mein hangamon ka andaza nahin hota

jidhar mahsus ho KHushbu usi jaanib baDhe jao

andheri raat mein raston ka andaza nahin hota

jo sadiyon ki kasak le kar guzar jate hain duniya se

muarriKH ko bhi un lamhon ka andaza nahin hota

ye rahbar hain ki rahzan hain masiha hain ki qatil hain

hamein apne numaindon ka andaza nahin hota

nazar ho lakh gahri aur basirat-ashna phir bhi

naqabon mein kabhi chehron ka andaza nahin hota

zamin par aao phir dekho hamari ahmiyat kya hai

bulandi se kabhi zarron ka andaza nahin hota

wafaon ke tasalsul se bhi aksar TuT jate hain

mohabbat ke hasin rishton ka andaza nahin hota

utar jate hain ruh o dil mein kitni wusaten le kar

ghazal ke dilruba lahjon ka andaza nahin hota

saliqe se sajaana aainon ko warna ai 'razmi'

ghalat ruKH ho to phir chehron ka andaza nahin hota