abhi mera aaftab ufuq ki hudud se aashna nahin hai

abhī mirā āftāb ufuq kī hudūd se āshnā nahīñ hai

mirī bhī shab kī sahar hai lekin numūd se āshnā nahīñ hai

khule kisī ke shu.ūr par to mujhe bhī us kā surāġh de de

ki merā jauhar hunūz apne vajūd se āshnā nahīñ hai

ġhazab hai fitrat kā dasht-o-kohsār meñ navā-e-sukūt bharnā

magar vo kyā sun sakegā jo is surūd se āshnā nahīñ hai

maiñ kis gumāñ par kahūñ zamāne meñ merā āġhāz ho chukā hai

ki merā lamha abhī tak apne varūd se āshnā nahīñ hai

ḳhabar nahīñ kārobār-e-ulfat meñ jā rahī hai kidhar tabī.at

ziyāñ se rakhtī nahīñ ta.āruf ki suud se āshnā nahīñ hai

dilā rahā huuñ maiñ us ko ehsās us kī pahlī rafāqatoñ kā

jo aaj 'iqbāl' merī būd-o-nabūd se āshnā nahīñ hai

abhi mera aaftab ufuq ki hudud se aashna nahin hai

meri bhi shab ki sahar hai lekin numud se aashna nahin hai

khule kisi ke shuur par to mujhe bhi us ka suragh de de

ki mera jauhar hunuz apne wajud se aashna nahin hai

ghazab hai fitrat ka dasht-o-kohsar mein nawa-e-sukut bharna

magar wo kya sun sakega jo is surud se aashna nahin hai

main kis guman par kahun zamane mein mera aaghaz ho chuka hai

ki mera lamha abhi tak apne warud se aashna nahin hai

KHabar nahin karobar-e-ulfat mein ja rahi hai kidhar tabiat

ziyan se rakhti nahin taaruf ki sud se aashna nahin hai

dila raha hun main us ko ehsas us ki pahli rafaqaton ka

jo aaj 'iqbaal' meri bud-o-nabud se aashna nahin hai