abhi sach ka diya jalta kahan hai

abhī sach kā diyā jaltā kahāñ hai

havā kā ruḳh abhī badlā kahāñ hai

bahār-e-dasht-ārā.ī kā mausam

zamīnoñ par abhī utrā kahāñ hai

musāfir haiñ ham aise qāfile ke

pata jis ko nahīñ jaanā kahāñ hai

ġhubār-e-āshnā.ī uḌ rahā hai

koī chehra nazar aatā kahāñ hai

sab apne bahr-e-ġham meñ ġhota-zan haiñ

nashāt-e-dard kā dariyā kahāñ hai

pahāḌ ab ābshāreñ ro rahe haiñ

ye bādal TuuT kar barsā kahāñ hai

anā zinda agar hai aadmī meñ

to phir ye maut se Dartā kahāñ hai

mirī har shab mirā har din safar hai

ḳhudā mālūm ab ruknā kahāñ hai

ajab halchal mire andar machī hai

qayāmat hai magar barpā kahāñ hai

bagūle bām-o-dar se pūchhte haiñ

hamāre raqs kā sahrā kahāñ hai

ajab be-ḳhvābiyoñ meñ umr guzrī

jise sochā use dekhā kahāñ hai

diloñ meñ ek rabt-e-bāhamī hai

abhī ye silsila TuuTā kahāñ hai

gadāyān-e-mohabbat pūchhte haiñ

hamārā vo saḳhī daatā kahāñ hai

kulāh-e-hirs kab rakkhī hai sar par

qabā-e-kizb ko pahnā kahāñ hai

hadīs-e-tā.at-o-āyāt-e-haq ko

koī is daur meñ suntā kahāñ hai

shi.ār-e-ijz-o-zauq-e-inkisārī

ye sikka shahr meñ chaltā kahāñ hai

maiñ duniyā ke liye zinda huuñ 'mohsin'

mujhe ḳhud ḳhvāhish-e-duniyā kahāñ hai

abhi sach ka diya jalta kahan hai

hawa ka ruKH abhi badla kahan hai

bahaar-e-dasht-arai ka mausam

zaminon par abhi utra kahan hai

musafir hain hum aise qafile ke

pata jis ko nahin jaana kahan hai

ghubar-e-ashnai uD raha hai

koi chehra nazar aata kahan hai

sab apne bahr-e-gham mein ghota-zan hain

nashat-e-dard ka dariya kahan hai

pahaD ab aabshaaren ro rahe hain

ye baadal TuT kar barsa kahan hai

ana zinda agar hai aadmi mein

to phir ye maut se Darta kahan hai

meri har shab mera har din safar hai

KHuda malum ab rukna kahan hai

ajab halchal mere andar machi hai

qayamat hai magar barpa kahan hai

bagule baam-o-dar se puchhte hain

hamare raqs ka sahra kahan hai

ajab be-KHwabiyon mein umr guzri

jise socha use dekha kahan hai

dilon mein ek rabt-e-bahami hai

abhi ye silsila TuTa kahan hai

gadayan-e-mohabbat puchhte hain

hamara wo saKHi data kahan hai

kulah-e-hirs kab rakkhi hai sar par

qaba-e-kizb ko pahna kahan hai

hadis-e-taat-o-ayat-e-haq ko

koi is daur mein sunta kahan hai

shiar-e-ijz-o-zauq-e-inkisari

ye sikka shahr mein chalta kahan hai

main duniya ke liye zinda hun 'mohsin'

mujhe KHud KHwahish-e-duniya kahan hai