ابھی سے شکوۂ غفلت شعار کیا ہوگا

ابھی سے شکوۂ غفلت شعار کیا ہوگا

یہ ابتدا ہے تو انجام کار کیا ہوگا

رہ حیات میں وہ کامگار کیا ہوگا

جو سوچتا ہے کہ انجام کار کیا ہوگا

عداوتوں کے اندھیرے ہیں رنج و غم کی دھوپ

یہی رہیں گے جو لیل و نہار کیا ہوگا

خوشی مناؤ مسرت کے چند لمحے ہیں

یہ بھول جاؤ کہ بعد از بہار کیا ہوگا

غم حبیب سے دامن چھڑا لیا جائے

تو پھر علاج غم روزگار کیا ہوگا

وہ ایک شاعر اعظم کہ نام تھا جامیؔ

اب اس سا کوئی حقیقت نگار کیا ہوگا

شب فراق تو رو رو کے کاٹ لی رونقؔ

اب آ رہی ہے شب انتظار کیا ہوگا