abhi se shikwa-e-ghaflat-shiar kya hoga

abhī se shikva-e-ġhaflat-shi.ār kyā hogā

ye ibtidā hai to anjām-e-kār kyā hogā

rah-e-hayāt meñ vo kāmgār kyā hogā

jo sochtā hai ki anjām-e-kār kyā hogā

adāvatoñ ke añdhere haiñ ranj-o-ġham kī dhuup

yahī raheñge jo lail-o-nahār kyā hogā

ḳhushī manāo masarrat ke chand lamhe haiñ

ye bhuul jaao ki bād-az-bahār kyā hogā

ġham-e-habīb se dāman chhuḌā liyā jaa.e

to phir ilāj-e-ġham-e-rozgār kyā hogā

vo ek shāi.r-e-āzam ki naam thā 'jāmī'

ab us sā koī haqīqat-nigār kyā hogā

shab-e-firāq to ro ro ke kaaT lī 'raunaq'

ab aa rahī hai shab-e-intizār kyā hogā

abhi se shikwa-e-ghaflat-shiar kya hoga

ye ibtida hai to anjam-e-kar kya hoga

rah-e-hayat mein wo kaamgar kya hoga

jo sochta hai ki anjam-e-kar kya hoga

adawaton ke andhere hain ranj-o-gham ki dhup

yahi rahenge jo lail-o-nahaar kya hoga

KHushi manao masarrat ke chand lamhe hain

ye bhul jao ki baad-az-bahaar kya hoga

gham-e-habib se daman chhuDa liya jae

to phir ilaj-e-gham-e-rozgar kya hoga

wo ek shair-e-azam ki nam tha 'jami'

ab us sa koi haqiqat-nigar kya hoga

shab-e-firaq to ro ro ke kaT li 'raunaq'

ab aa rahi hai shab-e-intizar kya hoga