abhi tak jis ko apnaya nahin tha

abhī tak jis ko apnāyā nahīñ thā

vo sirf ik dhuup thī saaya nahīñ thā

gharauñde ret ke ban to ga.e the

Thahar jā.eñge ye sochā nahīñ thā

na jaane merī bastī meñ huā kyā

vahī saḌkeñ thiiñ hangāma nahīñ thā

jise ḳhvāboñ ke shīshoñ meñ rakhā thā

vo aisā thā magar vaisā nahīñ thā

nagar meñ vārdāteñ ho chukī thiiñ

magar mai-ḳhānoñ meñ charchā nahīñ thā

jo sadiyoñ ke mizājoñ ko badal de

vo lamha aaj tak guzrā nahīñ thā

sabhī ko matlabī paayā jahāñ meñ

har ik apnā thā par apnā nahīñ thā

mire saath aur kitne the masā.il

hisār-e-zāt meñ tanhā nahīñ thā

'razā' kyā tum ne apnā aks dekhā

vo patthar thā magar shīsha nahīñ thā

abhi tak jis ko apnaya nahin tha

wo sirf ek dhup thi saya nahin tha

gharaunde ret ke ban to gae the

Thahar jaenge ye socha nahin tha

na jaane meri basti mein hua kya

wahi saDken thin hangama nahin tha

jise KHwabon ke shishon mein rakha tha

wo aisa tha magar waisa nahin tha

nagar mein wardaten ho chuki thin

magar mai-KHanon mein charcha nahin tha

jo sadiyon ke mizajon ko badal de

wo lamha aaj tak guzra nahin tha

sabhi ko matlabi paya jahan mein

har ek apna tha par apna nahin tha

mere sath aur kitne the masail

hisar-e-zat mein tanha nahin tha

'raza' kya tum ne apna aks dekha

wo patthar tha magar shisha nahin tha