abhi tak tishna-e-takmil meri zindagani hai

abhī tak tishna-e-takmīl merī zindagānī hai

abhī tak intizār-e-dost kī baaqī kahānī hai

ye apnī zindagī ramz-e-man-o-tū kī kahānī hai

na kuchh qurb-e-makānī hai na kuchh bo'd-e-zamānī hai

murattab kar rahā huuñ dāstāñ husn-e-gurezāñ kī

tabī'at meñ ba-rū-e-kār dariyā kī ravānī hai

tumhārā husn bhī kāmil hamārā 'ishq bhī qābil

na is kā koī ham-sar hai na is kā koī saanī hai

'jamālī' yās-o-hasrat ke sivā kuchh bhī nahīñ paayā

ye apnī zindagī bargashta qismat kī kahānī hai

abhi tak tishna-e-takmil meri zindagani hai

abhi tak intizar-e-dost ki baqi kahani hai

ye apni zindagi ramz-e-man-o-tu ki kahani hai

na kuchh qurb-e-makani hai na kuchh bo'd-e-zamani hai

murattab kar raha hun dastan husn-e-gurezan ki

tabi'at mein ba-ru-e-kar dariya ki rawani hai

tumhaara husn bhi kaamil hamara 'ishq bhi qabil

na is ka koi ham-sar hai na is ka koi sani hai

'jamali' yas-o-hasrat ke siwa kuchh bhi nahin paya

ye apni zindagi bargashta qismat ki kahani hai