abhi tak yaad hai mujhko mera sarshaar ho jaana

abhī tak yaad hai mujh ko mirā sarshār ho jaanā

nazar kā nā-gahāñ uThnā tirā dīdār ho jaanā

mirī hastī kā hāsil ban gayā vo qīmtī lamha

vo ik Tuk dekhnā un kā mirā gulnār ho jaanā

vahī lamha ġhanīmat jāniye jo hañs ke kaT jaa.e

sukūñ khonā hai yaksar zindagī kā baar ho jaanā

abhī kal khelte phirte the āñkheñ miich kar ham tum

tumhīñ se paḌ rahā hai ab hameñ hushyār ho jaanā

na.ī ḳhvāhish har ik lamha tamannā chāñd chhūne kī

humaknā dil kā siine meñ mirā bezār ho jaanā

na dil meñ jazba-e-īmāñ na saudā sarfaroshī kā

to phir kyoñ chāhte ho aag kā gulzār ho jaanā

dabī hai phir koī sehn-e-chaman meñ aaj chingārī

jo tum jaanā gulistāñ meñ zarā hushyār ho jaanā

jo dil kā imtihāñ chāho to phir kachchā ghaḌā lā do

vafā meñ Duub jaanā hai nadī ke paar ho jaanā

kahāñ tak saath degā jazba-e-īsār 'farzāna'

lahū denā chaman ko aur pas-e-dīvār ho jaanā

abhi tak yaad hai mujh ko mera sarshaar ho jaana

nazar ka na-gahan uThna tera didar ho jaana

meri hasti ka hasil ban gaya wo qimti lamha

wo ek Tuk dekhna un ka mera gulnar ho jaana

wahi lamha ghanimat jaaniye jo hans ke kaT jae

sukun khona hai yaksar zindagi ka bar ho jaana

abhi kal khelte phirte the aankhen mich kar hum tum

tumhin se paD raha hai ab hamein hushyar ho jaana

nai KHwahish har ek lamha tamanna chand chhune ki

humakna dil ka sine mein mera bezar ho jaana

na dil mein jazba-e-iman na sauda sarfaroshi ka

to phir kyon chahte ho aag ka gulzar ho jaana

dabi hai phir koi sehn-e-chaman mein aaj chingari

jo tum jaana gulistan mein zara hushyar ho jaana

jo dil ka imtihan chaho to phir kachcha ghaDa la do

wafa mein Dub jaana hai nadi ke par ho jaana

kahan tak sath dega jazba-e-isar 'farzana'

lahu dena chaman ko aur pas-e-diwar ho jaana