abhi to hausla-e-karobar baqi hai

abhī to hausla-e-kārobār baaqī hai

ye kam ki āmad-e-fasl-e-bahār baaqī hai

abhī to shahr ke khañDaroñ meñ jhāñknā hai mujhe

ye dekhnā bhī to hai koī yaar baaqī hai

abhī to kāñToñ bhare dasht kī karo bāteñ

abhī to jaib o garebāñ meñ taar baaqī hai

abhī to kāTnā hai teshoñ se chaTTānoñ ko

abhī to marhala-e-kohsār baaqī hai

abhī to jhelnā hai sañglāḳh chashmoñ ko

abhī to silsila-e-āb-shār baaqī hai

abhī to DhūñDnī haiñ raah meñ kamīñ-gāheñ

abhī to mārka-e-gīr-o-dār baaqī hai

abhī na sāya-e-dīvār kī talāsh karo

abhī to shiddat-e-nisfun-nahār baaqī hai

abhī to lenā hai ham ko hisāb-e-shahr-e-qitāl

abhī to ḳhūn-e-gulū kā shumār baaqī hai

abhī yahāñ to shafaq-gūñ koī ufuq hī nahīñ

abhī tasādum-e-lail-o-nahār baaqī hai

ye ham ko chhoḌ ke tanhā kahāñ chale 'vāmiq'

abhī to manzil-e-merāj-e-dār baaqī hai

abhi to hausla-e-karobar baqi hai

ye kam ki aamad-e-fasl-e-bahaar baqi hai

abhi to shahr ke khanDaron mein jhankna hai mujhe

ye dekhna bhi to hai koi yar baqi hai

abhi to kanTon bhare dasht ki karo baaten

abhi to jaib o gareban mein tar baqi hai

abhi to kaTna hai teshon se chaTTanon ko

abhi to marhala-e-kohsar baqi hai

abhi to jhelna hai sanglaKH chashmon ko

abhi to silsila-e-ab-shaar baqi hai

abhi to DhunDni hain rah mein kamin-gahen

abhi to marka-e-gir-o-dar baqi hai

abhi na saya-e-diwar ki talash karo

abhi to shiddat-e-nisfun-nahaar baqi hai

abhi to lena hai hum ko hisab-e-shahr-e-qital

abhi to KHun-e-gulu ka shumar baqi hai

abhi yahan to shafaq-gun koi ufuq hi nahin

abhi tasadum-e-lail-o-nahaar baqi hai

ye hum ko chhoD ke tanha kahan chale 'wamiq'

abhi to manzil-e-meraj-e-dar baqi hai