abhi to itna andhera nazar nahin aata

abhī to itnā añdherā nazar nahīñ aatā

to saath kyoñ merā saayā nazar nahīñ aatā

in āñkhoñ se ye zamāna to dekh saktā huuñ

bas ek apnā hī chehra nazar nahīñ aatā

jab ek andhā añdhere meñ dekh letā hai

mujhe ujāloñ meñ kyā kyā nazar nahīñ aatā

bañdhī yaqīn kī paTTī hamārī āñkhoñ par

so chhal fareb yā dhoka nazar nahīñ aatā

jo dikh rahe haiñ vo chābī ke sab khilaune haiñ

yahāñ to koī bhī zinda nazar nahīñ aatā

tarāshe but kī to tārīf sabhī karte par

hamāre haath kā chhālā nazar nahīñ aatā

abhī to phailī yahāñ dhuñdh itnī nafrat kī

kisī ko pyaar kā rasta nazar nahīñ aatā

'anīs' yuuñ to hazāroñ se roz miltā huuñ

magar mujhe koī tum sā nazar nahīñ aatā

abhi to itna andhera nazar nahin aata

to sath kyon mera saya nazar nahin aata

in aankhon se ye zamana to dekh sakta hun

bas ek apna hi chehra nazar nahin aata

jab ek andha andhere mein dekh leta hai

mujhe ujalon mein kya kya nazar nahin aata

bandhi yaqin ki paTTi hamari aankhon par

so chhal fareb ya dhoka nazar nahin aata

jo dikh rahe hain wo chabi ke sab khilaune hain

yahan to koi bhi zinda nazar nahin aata

tarashe but ki to tarif sabhi karte par

hamare hath ka chhaala nazar nahin aata

abhi to phaili yahan dhundh itni nafrat ki

kisi ko pyar ka rasta nazar nahin aata

'anis' yun to hazaron se roz milta hun

magar mujhe koi tum sa nazar nahin aata