abhi wo kamsin ubhar raha hai abhi hai us par shabab aadha

abhī vo kamsin ubhar rahā hai abhī hai us par shabāb aadhā

abhī jigar meñ ḳhalish hai aadhī abhī hai mujh par itaab aadhā

hijāb o jalve kī kashmakash meñ uThāyā us ne naqāb aadhā

idhar huvaidā sahāb aadhā udhar ayaañ māhtāb aadhā

mire savāl-e-visāl par tum nazar jhukā kar khaḌe hue ho

tumhīñ batāo ye baat kyā hai savāl puurā javāb aadhā

lapak ke mujh ko gale lagāyā ḳhudā kī rahmat ne roz-e-mahshar

abhī sunāyā thā mohtasib ne mire gunah kā hisāb aadhā

bajā ki ab baal to siyah haiñ magar badan meñ sakat nahīñ hai

shabāb laayā ḳhizāb lekin ḳhizāb laayā shabāb aadhā

lagā ke laase pe le ke aayā huuñ shaiḳh sāhab ko mai-kade tak

agar ye do ghoñT aaj pī leñ milegā mujh ko savāb aadhā

kabhī sitam hai kabhī karam hai kabhī tavajjoh kabhī taġhāful

ye saaf zāhir hai mujh pe ab tak huā huuñ maiñ kāmyāb aadhā

kisī kī chashm-e-surūr aavar se ashk aariz pe Dhal rahā hai

agar shu.ūr-e-nazar hai dekho sharāb aadhī gulāb aadhā

purāne vaqtoñ ke log ḳhush haiñ magar taraqqī pasand ḳhāmosh

tirī ġhazal ne kiyā hai barpā 'sahar' abhī inqilāb aadhā

abhi wo kamsin ubhar raha hai abhi hai us par shabab aadha

abhi jigar mein KHalish hai aadhi abhi hai mujh par itab aadha

hijab o jalwe ki kashmakash mein uThaya us ne naqab aadha

idhar huwaida sahab aadha udhar ayan mahtab aadha

mere sawal-e-visal par tum nazar jhuka kar khaDe hue ho

tumhin batao ye baat kya hai sawal pura jawab aadha

lapak ke mujh ko gale lagaya KHuda ki rahmat ne roz-e-mahshar

abhi sunaya tha mohtasib ne mere gunah ka hisab aadha

baja ki ab baal to siyah hain magar badan mein sakat nahin hai

shabab laya KHizab lekin KHizab laya shabab aadha

laga ke lase pe le ke aaya hun shaiKH sahab ko mai-kade tak

agar ye do ghonT aaj pi len milega mujh ko sawab aadha

kabhi sitam hai kabhi karam hai kabhi tawajjoh kabhi taghaful

ye saf zahir hai mujh pe ab tak hua hun main kaamyab aadha

kisi ki chashm-e-surur aawar se ashk aariz pe Dhal raha hai

agar shuur-e-nazar hai dekho sharab aadhi gulab aadha

purane waqton ke log KHush hain magar taraqqi pasand KHamosh

teri ghazal ne kiya hai barpa 'sahar' abhi inqilab aadha