abhi zamir mein thoDi si jaan baqi hai

abhī zamīr meñ thoḌī sī jaan baaqī hai

abhī hamārā koī imtihān baaqī hai

hamāre ghar ko to ujḌe hue zamāna huā

magar sunā hai abhī vo makān baaqī hai

hamārī un se jo thī guftugū vo ḳhatm huī

magar sukūt sā kuchh darmiyān baaqī hai

hamāre zehn kī bastī meñ aag aisī lagī

ki jo thā ḳhaak huā ik dukān baaqī hai

vo zaḳhm bhar gayā arsa huā magar ab tak

zarā sā dard zarā sā nishān baaqī hai

zarā sī baat jo phailī to dāstān banī

vo baat ḳhatm huī dāstān baaqī hai

ab aayā tiir chalāne kā fan to kyā aayā

hamāre haath meñ ḳhālī kamān baaqī hai

abhi zamir mein thoDi si jaan baqi hai

abhi hamara koi imtihan baqi hai

hamare ghar ko to ujDe hue zamana hua

magar suna hai abhi wo makan baqi hai

hamari un se jo thi guftugu wo KHatm hui

magar sukut sa kuchh darmiyan baqi hai

hamare zehn ki basti mein aag aisi lagi

ki jo tha KHak hua ek dukan baqi hai

wo zaKHm bhar gaya arsa hua magar ab tak

zara sa dard zara sa nishan baqi hai

zara si baat jo phaili to dastan bani

wo baat KHatm hui dastan baqi hai

ab aaya tir chalane ka fan to kya aaya

hamare hath mein KHali kaman baqi hai