abr ke bin dekhe hargiz KHush dil-e-mastan na ho

abr ke bin dekhe hargiz ḳhush dil-e-mastāñ na ho

tiir bārāñ hove mujh par jab talak bārāñ na ho

merī rusvā.ī ne tere husn kī kī hai numūd

jab talak shabnam nahīñ ro.e to gul ḳhandāñ na ho

tarz terī guftugū kī hai gavāh-e-mai-kashī

bū-e-gul aur nashsha-e-sahbā kabhī pinhāñ na ho

shaiḳh ko vo jahl hai sau baar ka.abe ke ta.iiñ

jaa.e aur aa.e va-lekin phir gadhā insāñ na ho

zikr-e-abrū-e-butāñ se kyuuñ burā maane hai shaiḳh

kyā huā kāfir tujhe qible se rū-gardāñ na ho

sach batā ai jān-e-ishq o ishq-bāzāñ kyā hai tū

bin tire maiñ us badan sā huuñ ki jis meñ jaañ na ho

yaañ se jā shaitān zulf-e-yār ko ham de chuke

āshiqoñ kā diin hai ye shaiḳh kā īmāñ na ho

tark-e-tāz-e-ġhamza kā us kī yahī Dar hai 'razā'

ye ġham-ābād apnā shahr-e-dil kahīñ vīrāñ na ho

abr ke bin dekhe hargiz KHush dil-e-mastan na ho

tir baran howe mujh par jab talak baran na ho

meri ruswai ne tere husn ki ki hai numud

jab talak shabnam nahin roe to gul KHandan na ho

tarz teri guftugu ki hai gawah-e-mai-kashi

bu-e-gul aur nashsha-e-sahba kabhi pinhan na ho

shaiKH ko wo jahl hai sau bar kabe ke tain

jae aur aae wa-lekin phir gadha insan na ho

zikr-e-abru-e-butan se kyun bura mane hai shaiKH

kya hua kafir tujhe qible se ru-gardan na ho

sach bata ai jaan-e-ishq o ishq-bazan kya hai tu

bin tere main us badan sa hun ki jis mein jaan na ho

yan se ja shaitan zulf-e-yar ko hum de chuke

aashiqon ka din hai ye shaiKH ka iman na ho

tark-e-taz-e-ghamza ka us ki yahi Dar hai 'raza'

ye gham-abaad apna shahr-e-dil kahin viran na ho