abr ki oT se chhalka hai udhar dhup ka rang

abr kī oT se chhalkā hai udhar dhuup kā rang

hai sukūñ-baḳhsh bahut vaqt-e-sahar dhuup kā rang

vādiyāñ jhīleñ hoñ parbat hoñ ki hoñ dasht-o-daman

kitne lagte haiñ hasīñ chamke agar dhuup kā rang

anjuman shab kī uThī nūr-e-sahar aate hī

oḌhne lag ga.e gulshan meñ shajar dhuup kā rang

shab kī tārīkī meñ so.e the jo thak kar taa.ir

tāza-dam ho ga.e jab aayā nazar dhuup kā rang

vaqt zindāñ ke añdheroñ meñ guzārā jis ne

us ke hujre meñ kare kaash guzar dhuup kā rang

'nāzlī' pahn liyā dhartī ne zardoz libās

jab ufuq se huā firdaus-e-nazar dhuup kā rang

abr ki oT se chhalka hai udhar dhup ka rang

hai sukun-baKHsh bahut waqt-e-sahar dhup ka rang

wadiyan jhilen hon parbat hon ki hon dasht-o-daman

kitne lagte hain hasin chamke agar dhup ka rang

anjuman shab ki uThi nur-e-sahar aate hi

oDhne lag gae gulshan mein shajar dhup ka rang

shab ki tariki mein soe the jo thak kar tair

taza-dam ho gae jab aaya nazar dhup ka rang

waqt zindan ke andheron mein guzara jis ne

us ke hujre mein kare kash guzar dhup ka rang

'nazli' pahn liya dharti ne zardoz libas

jab ufuq se hua firdaus-e-nazar dhup ka rang