abr uTTha hai gire qatra-e-baran sir par

abr uTThā hai gire qatra-e-bārāñ sir par

guyyāñ hushiyār ki hai aish kā sāmāñ sar par

karte kyā kyā nahīñ vo ranj ke sāmāñ sar par

rakhte lā lā haiñ buā roz muġhal jaañ sar par

ab na jā.eñge chhināloñ kī galī meñ mirzā

qasmeñ khāte haiñ buā rakhte haiñ qur.āñ sar par

hasrat-e-dīd hai jaañ tan se na niklegī buā

kyoñ farishte haiñ liye maut kā chālāñ sar par

bigḌe tevar haiñ ulajhte haiñ ḳhafā hote haiñ

shaiḳh jī ke hai buā aaj bhī shaitāñ sar par

saath ranDī ke chale mirzā jī kis shaan ke saath

dahnā baġhloñ meñ dabā.e hue bāyāñ sar par

chuTkiyāñ saaf kahe detī haiñ dil kī ham se

pīr-o-murshid hai vahī aaj bhī shaitāñ sar par

ab farangī haiñ buā taḳht pe ham bāj-guzār

kabhī rakhte the yahāñ taaj musalmāñ sar par

abr uTTha hai gire qatra-e-baran sir par

guyyan hushiyar ki hai aish ka saman sar par

karte kya kya nahin wo ranj ke saman sar par

rakhte la la hain bua roz mughal jaan sar par

ab na jaenge chhinalon ki gali mein mirza

qasmen khate hain bua rakhte hain quran sar par

hasrat-e-did hai jaan tan se na niklegi bua

kyon farishte hain liye maut ka chaalan sar par

bigDe tewar hain ulajhte hain KHafa hote hain

shaiKH ji ke hai bua aaj bhi shaitan sar par

sath ranDi ke chale mirza ji kis shan ke sath

dahna baghlon mein dabae hue bayan sar par

chuTkiyan saf kahe deti hain dil ki hum se

pir-o-murshid hai wahi aaj bhi shaitan sar par

ab farangi hain bua taKHt pe hum baj-guzar

kabhi rakhte the yahan taj musalman sar par