abru-e-abr se karta hai ishaara mujhko

abrū-e-abr se kartā hai ishāra mujh ko

jhalak us aañkh kī dikhlā ke sitāra mujh ko

huuñ maiñ vo sham.a sar-e-tāq jalā kar sar-e-shām

bhuul jaatā hai mirā anjuman-ārā mujh ko

rā.egāñ vus.at-e-vīrāñ meñ ye khilte hue phuul

un ko dekhūñ to ye dete haiñ sahārā mujh ko

merī hastī hai faqat mauj-e-havā naqsh-e-habāb

koī dam aur kareñ aap gavārā mujh ko

daam phailātī rahī sūd-o-ziyāñ kī ye bisāt

haañ magar mere junūñ ne nahīñ haarā mujh ko

kuchh shab-o-roz-o-mah-o-sāl guzar kar mujh par

vaqt ne tā-ba-abad ḳhud pe guzārā mujh ko

mauj-e-be-tāb huuñ maiñ mere anāsir haiñ kuchh aur

chāhiye sohbat-e-sāhil se kinārā mujh ko

rizq se mere mire dil ko hai ranjish 'ḳhurshīd'

āsmānoñ se zamīnoñ pe utārā mujh ko

abru-e-abr se karta hai ishaara mujh ko

jhalak us aankh ki dikhla ke sitara mujh ko

hun main wo shama sar-e-taq jala kar sar-e-sham

bhul jata hai mera anjuman-ara mujh ko

raegan wusat-e-viran mein ye khilte hue phul

un ko dekhun to ye dete hain sahaara mujh ko

meri hasti hai faqat mauj-e-hawa naqsh-e-habab

koi dam aur karen aap gawara mujh ko

dam phailati rahi sud-o-ziyan ki ye bisat

han magar mere junun ne nahin haara mujh ko

kuchh shab-o-roz-o-mah-o-sal guzar kar mujh par

waqt ne ta-ba-abad KHud pe guzara mujh ko

mauj-e-be-tab hun main mere anasir hain kuchh aur

chahiye sohbat-e-sahil se kinara mujh ko

rizq se mere mere dil ko hai ranjish 'KHurshid'

aasmanon se zaminon pe utara mujh ko