abru ki teri zarb-e-do-dasti chali gai

abrū kī terī zarb-e-do-dastī chalī ga.ī

jitnī kasā.ī saif ye kastī chalī ga.ī

pesh-e-nazar hasīnoñ kī bastī chalī ga.ī

ā.īne kī bhī husn-parastī chalī ga.ī

achchhā kiyā sharāb ḳhudā ne harām kī

rindoñ ke saath bāda-parastī chalī ga.ī

kis shahr se misāl duuñ aqlīm-e-ishq ko

jitnī ye ujḌī aur bhī bastī chalī ga.ī

roze mah-e-siyām meñ toḌe sharāb se

ham fāqa-mastoñ kī vahī mastī chalī ga.ī

vahshat-kade se rahmat-e-haq ne bhī kī gurez

badle hamāre ghar se barastī chalī ga.ī

khā.īñ ḳhudā kī raah meñ lākhoñ hī Thokareñ

tā-lā-makāñ bulandī-o-pastī chalī ga.ī

mastoñ ne tark-e-mai kī qasam khaa.ī hai to kyā

tauba kahāñ vo baat jo mastī chalī ga.ī

in abruoñ ne ek ishāre meñ jaan lī

yak-dast terī teġh-e-do-dastī chalī ga.ī

dil hī gayā to kaun butoñ kā kare ḳhayāl

ka.abe ke saath sañg parastī chalī ga.ī

hai āsmān tak tire giryāñ kā maz.haka

bijlī bhī rote dekh ke hañstī chalī ga.ī

go dil ke badle daulat-e-duniya-o-dīñ milī

to bhī ye jins haath se sastī chalī ga.ī

dāġh-e-sharāb dāman-e-taqvā meñ rah gayā

nashshe ko rūh-e-shaiḳh tarastī chalī ga.ī

tahtus-sarā ko pahuñchī hamārī farotanī

ham jitne past ho ga.e pastī chalī ga.ī

kyuuñ kar ho ijtimā-e-naqīzain ai 'munīr'

aate hī maut ke mirī hastī chalī ga.ī

abru ki teri zarb-e-do-dasti chali gai

jitni kasai saif ye kasti chali gai

pesh-e-nazar hasinon ki basti chali gai

aaine ki bhi husn-parasti chali gai

achchha kiya sharab KHuda ne haram ki

rindon ke sath baada-parasti chali gai

kis shahr se misal dun aqlim-e-ishq ko

jitni ye ujDi aur bhi basti chali gai

roze mah-e-siyam mein toDe sharab se

hum faqa-maston ki wahi masti chali gai

wahshat-kade se rahmat-e-haq ne bhi ki gurez

badle hamare ghar se barasti chali gai

khain KHuda ki rah mein lakhon hi Thokaren

ta-la-makan bulandi-o-pasti chali gai

maston ne tark-e-mai ki qasam khai hai to kya

tauba kahan wo baat jo masti chali gai

in abruon ne ek ishaare mein jaan li

yak-dast teri tegh-e-do-dasti chali gai

dil hi gaya to kaun buton ka kare KHayal

kabe ke sath sang parasti chali gai

hai aasman tak tere giryan ka mazhaka

bijli bhi rote dekh ke hansti chali gai

go dil ke badle daulat-e-duniya-o-din mili

to bhi ye jins hath se sasti chali gai

dagh-e-sharab daman-e-taqwa mein rah gaya

nashshe ko ruh-e-shaiKH tarasti chali gai

tahtus-sara ko pahunchi hamari farotani

hum jitne past ho gae pasti chali gai

kyun kar ho ijtima-e-naqizain ai 'munir'

aate hi maut ke meri hasti chali gai