achchhai se nata joD warna phir pachhtaega

achchhā.ī se naatā joḌ varna phir pachhtā.egā

ulTe-sīdhe dhande chhoḌ varna phir pachhtā.egā

mustaqbil kī tayyārī karne meñ hai hushyārī

vaqt se aage tū bhī dauḌ varna phir pachhtā.egā

dīvāreñ jo haa.il haiñ terī haar pe maa.il haiñ

dīvāroñ se sar mat phoḌ varna phir pachhtā.egā

daulat dene se 'izzat bachtī hai to kar himmat

sāmne rakh de ek karoḌ varna phir pachhtā.egā

ashk-e-nadāmat se dil kā bhīgā dāman hai achchhā

us dāman ko to na nichoḌ varna phir pachhtā.egā

jhūTī-sachchī kah kar jo tujh ko rusvā kartā ho

tū bhī us kā bhāñDā phoḌ varna phir pachhtā.egā

shāḳh pe rah ke pak jaa.eñ apne aap hī thak jaa.eñ

tū ye kachche phal mat toḌ varna phir pachhtā.egā

shaitānī panja kyā chiiz ek mujāhid tū hai 'azīz'

shaitānī panje ko maroḌ varna phir pachhtā.egā

achchhai se nata joD warna phir pachhtaega

ulTe-sidhe dhande chhoD warna phir pachhtaega

mustaqbil ki tayyari karne mein hai hushyari

waqt se aage tu bhi dauD warna phir pachhtaega

diwaren jo hail hain teri haar pe mail hain

diwaron se sar mat phoD warna phir pachhtaega

daulat dene se 'izzat bachti hai to kar himmat

samne rakh de ek karoD warna phir pachhtaega

ashk-e-nadamat se dil ka bhiga daman hai achchha

us daman ko to na nichoD warna phir pachhtaega

jhuTi-sachchi kah kar jo tujh ko ruswa karta ho

tu bhi us ka bhanDa phoD warna phir pachhtaega

shaKH pe rah ke pak jaen apne aap hi thak jaen

tu ye kachche phal mat toD warna phir pachhtaega

shaitani panja kya chiz ek mujahid tu hai 'aziz'

shaitani panje ko maroD warna phir pachhtaega