achchhi lagin kitabon mein baaten usul ki

achchhī lagīñ kitāboñ meñ bāteñ usuul kī

un par amal kiyā hai yahī ham ne bhuul kī

sāleh rivāyatoñ pe bhī aane lagā zavāl

qīmat baḌhī hai in dinoñ kāġhaz ke phuul kī

bachchoñ ke ruḳh pe dekhī hai māyūsiyoñ kī gard

jab ḳhālī haath ghar meñ pahuñchne kī bhuul kī

ik aarzū ne Daal diyā hai azaab meñ

kab tak sazā milegī mujhe ek bhuul kī

vo apne aap mil gayā taqdīr meñ jo thā

ham ne tamām umr-e-tag-o-dau fuzūl kī

ham ne to intizār meñ umreñ guzār diiñ

saa.at na aa.ī husn-e-karam ke nuzūl kī

e.azāz paane vāloñ meñ kyuuñ merā naam ho

'mehdī' jo ye zakāt na maiñ ne qubūl kī

achchhi lagin kitabon mein baaten usul ki

un par amal kiya hai yahi hum ne bhul ki

saleh riwayaton pe bhi aane laga zawal

qimat baDhi hai in dinon kaghaz ke phul ki

bachchon ke ruKH pe dekhi hai mayusiyon ki gard

jab KHali hath ghar mein pahunchne ki bhul ki

ek aarzu ne Dal diya hai azab mein

kab tak saza milegi mujhe ek bhul ki

wo apne aap mil gaya taqdir mein jo tha

hum ne tamam umr-e-tag-o-dau fuzul ki

hum ne to intizar mein umren guzar din

saat na aai husn-e-karam ke nuzul ki

eazaz pane walon mein kyun mera nam ho

'mehdi' jo ye zakat na main ne qubul ki