اچھی نہیں سوال پہ سائل سے چھیڑ چھاڑ

اچھی نہیں سوال پہ سائل سے چھیڑ چھاڑ

کی کیا سمجھ کے تم نے مرے دل سے چھیڑ چھاڑ

ہے مجھ سے قید و بند کا جھگڑا لگا ہوا

رہتی ہے روز طوق و سلاسل سے چھیڑ چھاڑ

لیلیٰ کا نام بھی نہیں صحرائے نجد میں

مجنوں عبث ہے اب کسی محمل سے چھیڑ چھاڑ

اب چھیڑتی ہے آ کے وہ یاد چمن مجھے

رہتی تھی جب گلوں سے عنادل سے چھیڑ چھاڑ

ساقی شراب ناب کا اڑتا چلا ہے رنگ

اٹھتی چلی ہے اب تری محفل سے چھیڑ چھاڑ

کٹتی چلی ہے منزل الفت اسی طرح

ہوتی چلی ہے رہبر منزل سے چھیڑ چھاڑ

محفل سے ان کی بڑھ کے یہ ظالم اٹھا نہ دے

کچھ درد کر رہا ہے مرے دل سے چھیڑ چھاڑ

یہ شوخیاں ہیں آمد فصل بہار کی

کلیاں جو کر رہی ہیں عنادل سے چھیڑ چھاڑ

آئینہ دیکھتے ہی وہ خاموش ہو گئے

کچھ کر نہ سکے مد مقابل سے چھیڑ چھاڑ

دینا اسے ہے مٹ کے جہاں کو فنا کا درس

کرتی ہے موج اس لئے ساحل سے چھیڑ چھاڑ

خوشترؔ نکل ہی آئیں گی باتیں بھی کام کی

کرتے رہا کرو کسی عاقل سے چھیڑ چھاڑ