achchhi nahin sawal pe sail se chheD-chhaD

achchhī nahīñ savāl pe saa.il se chheḌ-chhāḌ

kī kyā samajh ke tum ne mire dil se chheḌ-chhāḌ

hai mujh se qaid-o-band kā jhagḌā lagā huā

rahtī hai roz tauq-o-salāsil se chheḌ-chhāḌ

lailā kā naam bhī nahīñ sahrā-e-najd meñ

majnūñ abas hai ab kisī mahmil se chheḌ-chhāḌ

ab chheḌtī hai aa ke vo yād-e-chaman mujhe

rahtī thī jab guloñ se anādil se chheḌ-chhāḌ

saaqī sharāb-e-nāb kā uḌtā chalā hai rang

uThtī chalī hai ab tirī mahfil se chheḌ-chhāḌ

kaTtī chalī hai manzil-e-ulfat usī tarah

hotī chalī hai rahbar-e-manzil se chheḌ-chhāḌ

mahfil se un kī baḌh ke ye zālim uThā na de

kuchh dard kar rahā hai mire dil se chheḌ-chhāḌ

ye shoḳhiyāñ haiñ āmad-e-fasl-e-bahār kī

kaliyāñ jo kar rahī haiñ anādil se chheḌ-chhāḌ

ā.īna dekhte hī vo ḳhāmosh ho ga.e

kuchh kar na sake madd-e-muqābil se chheḌ-chhāḌ

denā use hai miT ke jahāñ ko fanā kā dars

kartī hai mauj is liye sāhil se chheḌ-chhāḌ

'ḳhushtar' nikal hī ā.eñgī bāteñ bhī kaam kī

karte rahā karo kisī aaqil se chheḌ-chhāḌ

achchhi nahin sawal pe sail se chheD-chhaD

ki kya samajh ke tum ne mere dil se chheD-chhaD

hai mujh se qaid-o-band ka jhagDa laga hua

rahti hai roz tauq-o-salasil se chheD-chhaD

laila ka nam bhi nahin sahra-e-najd mein

majnun abas hai ab kisi mahmil se chheD-chhaD

ab chheDti hai aa ke wo yaad-e-chaman mujhe

rahti thi jab gulon se anadil se chheD-chhaD

saqi sharab-e-nab ka uDta chala hai rang

uThti chali hai ab teri mahfil se chheD-chhaD

kaTti chali hai manzil-e-ulfat usi tarah

hoti chali hai rahbar-e-manzil se chheD-chhaD

mahfil se un ki baDh ke ye zalim uTha na de

kuchh dard kar raha hai mere dil se chheD-chhaD

ye shoKHiyan hain aamad-e-fasl-e-bahaar ki

kaliyan jo kar rahi hain anadil se chheD-chhaD

aaina dekhte hi wo KHamosh ho gae

kuchh kar na sake madd-e-muqabil se chheD-chhaD

dena use hai miT ke jahan ko fana ka dars

karti hai mauj is liye sahil se chheD-chhaD

'KHushtar' nikal hi aaengi baaten bhi kaam ki

karte raha karo kisi aaqil se chheD-chhaD