ada-e-husn ki husn-e-ada ki baat hoti hai

adā-e-husn kī husn-e-adā kī baat hotī hai

vafā kī āzmā.ish par jafā kī baat hotī hai

ye kaisā daur-daura hai qalam-rū-e-mohabbat meñ

butoñ kā hukm chaltā hai ḳhudā kī baat hotī hai

koī gunjā.ish-e-faryād-o-shikva tak nahīñ baaqī

ḳhatā-e-be-gunāhī par sazā kī baat hotī hai

bhar aatā hai dil-e-mahrūm-e-pursish dard-mandī se

kahīñ bhī jab kisī dard-āshnā kī baat hotī hai

phir us ke ba.ad kaam aatā hai jazba Duub marne kā

talātum tak ḳhudā-o-nā-ḳhudā kī baat hotī hai

duāoñ ke bharose par bigaḌte kaam bante haiñ

davā be-sūd Thahre to duā kī baat hotī hai

'rishī' qānūn-e-qudrat hai amal-dārī taġhayyur kī

maqām-e-intihā par ibtidā kī baat hotī hai

ada-e-husn ki husn-e-ada ki baat hoti hai

wafa ki aazmaish par jafa ki baat hoti hai

ye kaisa daur-daura hai qalam-ru-e-mohabbat mein

buton ka hukm chalta hai KHuda ki baat hoti hai

koi gunjaish-e-faryaad-o-shikwa tak nahin baqi

KHata-e-be-gunahi par saza ki baat hoti hai

bhar aata hai dil-e-mahrum-e-pursish dard-mandi se

kahin bhi jab kisi dard-ashna ki baat hoti hai

phir us ke baad kaam aata hai jazba Dub marne ka

talatum tak KHuda-o-na-KHuda ki baat hoti hai

duaon ke bharose par bigaDte kaam bante hain

dawa be-sud Thahre to dua ki baat hoti hai

'rishi' qanun-e-qudrat hai amal-dari taghayyur ki

maqam-e-intiha par ibtida ki baat hoti hai