ada-e-husn se bahar nikal bhi sakta tha

adā-e-husn se bāhar nikal bhī saktā thā

vo dekh kar mire aañsū pighal bhī saktā thā

shajar ne chhāñv barābar rakhī mire uupar

vagarna dhuup kā sūraj nigal bhī saktā thā

uThā.e phirtā maiñ kab tak tasavvurāt kā bojh

tirā ḳhayāl mere hosh chhal bhī saktā thā

use jahān ke rangoñ ne khā liyā varna

maiñ us ke vāste duniyā badal bhī saktā thā

tanābeñ rishtoñ kī TūTeñgī ham ko thā ma.alūm

magar ye marhala kuchh vaqt Tal bhī saktā thā

churā.e vaqt se maiñ ne ka.ī hasīñ lamhe

mujhe ye vaqt kā ajgar nigal bhī saktā thā

usī ke haath meñ thā merā faisla varna

mirā harīf gavāhī badal bhī saktā thā

safar kā dard bhalā koī kab talak jhele

safar hayāt kā āhista chal bhī saktā thā

ulajh ke rah ga.ī gutthī mirī kahānī kī

vo ek lamha jo kuchh der Tal bhī saktā thā

tilism TuuT na paayā gumān kā varna

daraḳht dil meñ mohabbat kā phal bhī saktā thā

badal bhī saktā hai ġhamgīñ sadāo kā āhang

vo chāhtā to mirā dil bahal bhī saktā thā

ada-e-husn se bahar nikal bhi sakta tha

wo dekh kar mere aansu pighal bhi sakta tha

shajar ne chhanw barabar rakhi mere upar

wagarna dhup ka suraj nigal bhi sakta tha

uThae phirta main kab tak tasawwuraat ka bojh

tera KHayal mere hosh chhal bhi sakta tha

use jahan ke rangon ne kha liya warna

main us ke waste duniya badal bhi sakta tha

tanaben rishton ki TuTengi hum ko tha malum

magar ye marhala kuchh waqt Tal bhi sakta tha

churae waqt se main ne kai hasin lamhe

mujhe ye waqt ka ajgar nigal bhi sakta tha

usi ke hath mein tha mera faisla warna

mera harif gawahi badal bhi sakta tha

safar ka dard bhala koi kab talak jhele

safar hayat ka aahista chal bhi sakta tha

ulajh ke rah gai gutthi meri kahani ki

wo ek lamha jo kuchh der Tal bhi sakta tha

tilism TuT na paya guman ka warna

daraKHt dil mein mohabbat ka phal bhi sakta tha

badal bhi sakta hai ghamgin sadao ka aahang

wo chahta to mera dil bahal bhi sakta tha