ada-e-rasm-e-mohabbat KHata si lagti hai

adā-e-rasm-e-mohabbat ḳhatā sī lagtī hai

hameñ to apnī vafā bhī sazā sī lagtī hai

safar meñ dhuup kā ehsās tak nahīñ hotā

hamāre sar pe kisī kī duā sī lagtī hai

vo merī fikr ko chhūtā hai jab ḳhayāloñ meñ

har ek lafz meñ bū-e-hinā sī lagtī hai

maiñ apne aap ko paatā huuñ rū-ba-rū apne

tumhārī yaad bhī ab aa.ina sī lagtī hai

ye surḳh phuul se chehre bhī zard-mā.il haiñ

nasīm-e-sub.h-e-chaman kuchh ḳhafā sī lagtī hai

mujhe zavāl sā lagtā hai ādamiyyat kā

jab aadmī kī anā bhī ḳhudā sī lagtī hai

mujhe talāsh hai ai dost aise logoñ kī

ki talḳh baat bhī jin ko davā sī lagtī hai

ye ranj-o-ġham ye masā.ib tirī ināyat haiñ

mirī fuġhāñ bhī tirī hī atā sī lagtī hai

ye zindagī to fasādoñ ko sauñp dī ham ne

ye rasm-o-rāh-e-aqīdat fanā sī lagtī hai

ġhubār chhāyā hai 'anvār' yuuñ ta.assub kā

fazā-e-dahr koī badduā sī lagtī hai

ada-e-rasm-e-mohabbat KHata si lagti hai

hamein to apni wafa bhi saza si lagti hai

safar mein dhup ka ehsas tak nahin hota

hamare sar pe kisi ki dua si lagti hai

wo meri fikr ko chhuta hai jab KHayalon mein

har ek lafz mein bu-e-hina si lagti hai

main apne aap ko pata hun ru-ba-ru apne

tumhaari yaad bhi ab aaina si lagti hai

ye surKH phul se chehre bhi zard-mail hain

nasim-e-subh-e-chaman kuchh KHafa si lagti hai

mujhe zawal sa lagta hai aadamiyyat ka

jab aadmi ki ana bhi KHuda si lagti hai

mujhe talash hai ai dost aise logon ki

ki talKH baat bhi jin ko dawa si lagti hai

ye ranj-o-gham ye masaib teri inayat hain

meri fughan bhi teri hi ata si lagti hai

ye zindagi to fasadon ko saunp di hum ne

ye rasm-o-rah-e-aqidat fana si lagti hai

ghubar chhaya hai 'anwar' yun tassub ka

faza-e-dahr koi baddua si lagti hai