ada-e-tul-e-suKHan kya wo iKHtiyar kare

adā-e-tūl-e-suḳhan kyā vo iḳhtiyār kare

jo arz-e-hāl ba-tarz-e-nigāh-e-yār kare

bahut hī talḳh-navā huuñ magar azīz-e-vatan

maiñ kyā karūñ jo tirā dard be-qarār kare

qadam ko faiz-e-junūñ se vo hausla hai nasīb

jo ḳhār-e-rāh ko bhī sham-e-rahguzār kare

jagā.eñ ham-safaroñ ko uThā.eñ parcham-e-shauq

na jaane kab ho sahar kaun intizār kare

misāl miltī hai kitnoñ kī us divāne se

chaman se duur jo baiThā ġham-e-bahār kare

dayār-e-jaur meñ rasta hai ik yahī varna

kise pasand hai ai dil ki sair-dār kare

ḳhudā kare ġham-e-gītī kā pech-o-tāb ai dost

kuchh aur bhī tirī zulfoñ ko tābdār kare

sitam ki teġh-e-qalam deñ use jo ai 'majrūh'

ġhazal ko qatl kare naġhme ko shikār kare

ada-e-tul-e-suKHan kya wo iKHtiyar kare

jo arz-e-haal ba-tarz-e-nigah-e-yar kare

bahut hi talKH-nawa hun magar aziz-e-watan

main kya karun jo tera dard be-qarar kare

qadam ko faiz-e-junun se wo hausla hai nasib

jo KHar-e-rah ko bhi sham-e-rahguzar kare

jagaen ham-safaron ko uThaen parcham-e-shauq

na jaane kab ho sahar kaun intizar kare

misal milti hai kitnon ki us diwane se

chaman se dur jo baiTha gham-e-bahaar kare

dayar-e-jaur mein rasta hai ek yahi warna

kise pasand hai ai dil ki sair-dar kare

KHuda kare gham-e-giti ka pech-o-tab ai dost

kuchh aur bhi teri zulfon ko tabdar kare

sitam ki tegh-e-qalam den use jo ai 'majruh'

ghazal ko qatl kare naghme ko shikar kare