adalat se yahan rota hua har muddai nikla

adālat se yahāñ rotā huā har mudda.ī niklā

karam-farmā.ī se munsif kī har mujrim barī niklā

jo hotā aarzī sadma to sah kar jī liye hote

magar kyā kījiye dāġh-e-judā.ī dā.imī niklā

amīr-e-shahr terī baḳhshishoñ kā hai pata ham ko

milā jo tujh se apnī aañkh meñ le kar namī niklā

yaqīñ hotā na thā hairat se ham sab ko rahe takte

hamām-e-zindagī se barhana har aadmī niklā

yaqīnī fat.h thī 'anvar' muqābil haar hī jaatā

qabīle kā mire sardār jo thā sāzishī niklā

adalat se yahan rota hua har muddai nikla

karam-farmai se munsif ki har mujrim bari nikla

jo hota aarzi sadma to sah kar ji liye hote

magar kya kijiye dagh-e-judai daimi nikla

amir-e-shahr teri baKHshishon ka hai pata hum ko

mila jo tujh se apni aankh mein le kar nami nikla

yaqin hota na tha hairat se hum sab ko rahe takte

hamam-e-zindagi se barhana har aadmi nikla

yaqini fath thi 'anwar' muqabil haar hi jata

qabile ka mere sardar jo tha sazishi nikla